Тус төслийн дэмжлэгтэйгээр 2016 онд мал эмнэлгийн төрийн байгууллагад ажиллаж буй 40 хүртэл насны, зохих шалгуур хангасан нийт 3 малын эмчийг гадаадын их, дээд сургуульд богино хугацааны интерншип хөтөлбөрт хамруулна. 
Сонгон шалгаруулалтанд оролцох хүсэлтэй малын эмч доорх баримтуудыг бүрэн бүрдүүлж “Малын эрүүл мэнд” төслийн (odontsetseg@livestock.mn) цахим хаягаар 2016 оны 6 дугаар сарын 20-ны өдрийн 18 цагаас өмнө PDF файл хэлбэрээр ирүүлнэ үү (Жич: Бүх баримтыг нэгтгэж нэг PDF болгож ирүүлэхийг гойд анхаарна уу!).
Сонгон шалгаруулалтыг “Малын эрүүл мэнд төсөл” Засгийн газрын хэрэгжүүлэгч агентлаг - Мал эмнэлэг, үржлийн газартай хамтарч зохион байгуулна.
1. Суралцах чиглэл 
• Мал эмнэлгийн бүх нарийн мэргэшлийг хүлээн зөвшөөрөх боловч клиникийн мэдлэг, ур чадвар хөгжүүлэх хөтөлбөрт илүү ач холбогдол өгнө.

2. Суралцах хугацаа 
• 1-2 сар

3. Англи хэлний мэдлэг 
• Talk Talk English англи хэлний сургуулийн 10 дугаар түвшний шалгалтыг амжилттай өгсөн байх; Тус хэлний сургуульд шалгалт өгснийг нотлох хуудсыг доор хавсаргав. Хавсралт 1–ийг үзнэ үү.
Жич: Talk Talk English сургуульд түвшин тогтоолгох шалгалт өгөхдөө тус байгууллагын ажилтан Мөнхзаяатай 99770797 дугаарын утсаар холбогдож урьдчилан цаг авна уу.
4. Өргөдөл гаргагч малын эмч доорх баримтуудыг бүрдүүлнэ (монгол, англиар): 
• Анкет
• Интерншип хөтөлбөрт хамрагдахыг дэмжсэн харъяалах байгууллагын удирдлагын албан бичиг
• Хүлээн авах гадаадын их, дээд сургуулийн зөвшөөрөл (Аль ч улсын сургууль байж болно. Зөвшөөрлийг албан бичгээр нотолно.)
• Хүлээн авах сургуулийн интерншип хөтөлбөр, удирдагч багшийн танилцуулга бүхий цогц мэдээлэл
• Хүлээн авах сургуулиас санал болгож буй интерншип хөтөлбөрийн төлбөрийн дэлгэрэнгүй задаргаа (сургалтын төлбөр, байр, хоол, унаа); Жич: Олон сургуулийн интерншип хөтөлбөр сургалтын төлбөр авдаггүй болохыг анхаарна уу.
• Малын эмчээс төсөлд хандсан өргөдөл: Үүнд:
- Интерншип хийх зорилго
- Тухайн сургуулийг сонгох болсон шалтгаан; Үүнд, тухайн сургуулийн санал болгож буй хөтөлбөр таны мэргэшил, цаашдын зорилготой хэрхэн уялдаж байгааг тайлбарлах
- Суралцаж ирээд мэргэжил нэгт нөхөдтэйгээ сурсан зүйлээ хэрхэн хуваалцах тухай
- Шаардлагатай гэж үзсэн бусад нэмэлт тайлбар

5. Суралцаж ирээд зайлшгүй гүйцэтгэх ажил:
• Сургалтын үр дүнгийн талаар дотоодын мал эмнэлгийн сэтгүүлд нийтлүүлнэ.
• Шинээр олж авсан ур чадвар, мэдлэгийнхээ талаар төслөөс зохион байгуулах сургалт, холбогдох хуралд илтгэнэ.

Лавлах зүйл байвал Малын эрүүл мэнд төслийн мэргэжилтэн Н.Одонцэцэгтэй (odontsetseg@livestock.mn) цахим хаягаар холбогдоно уу.